काठमाडौं, ७ वैशाख । नेपाली भान्सामा छुट्टै महत्व राख्ने अचार विश्व बजारमा पनि लोकप्रिय बन्दै गएको छ । पछिल्लो समय नेपालबाट अचार निकासी बढ्दै गएको तथ्याङ्कले नै देखाउँछ ।

भन्सार विभागका अनुसार चालू आर्थिक वर्ष (आव)को ९ महिनामा ११ करोड ३ लाख रुपैयाँ बराबरको १ लाख २६ हजार ३४१ किलोग्राम (केजी) अचार बाहिरिएको छ, जुन मूल्यका आधारमा गत साउनको तुलनामा करिब ४ गुणाले धेरै हो । आवको पहिलो महिना (साउन)मा २ करोड २३ लाख रुपैयाँको अचार निकासी भएको तथ्याङ्क छ ।

विशेषगरी नेपालबाट अष्ट्रेलिया, अमेरिका, बेलायत, कोरिया, जापान लगायत मुलुकमा अचार निर्यात गरिँदै आएको छ । गत चैतसम्ममा अष्ट्रेलियामा ३ करोड २२ लाख, अमेरिकामा २ करोड २१ लाख र इटलीमा १ करोड ६४ लाख रुपैयाँको अचार बाहिरिएको छ ।

स्रोत : भन्सार विभाग

चालू आवको ९ महिनामा नेपालले १४ खर्ब ९७ अर्ब ७२ करोड रुपैयाँको वैदेशिक व्यापार गरेको छ । गत आवको यसै अवधिमा १२ खर्ब ८१ अर्ब ३१ करोड रुपैयाँको व्यापार गरेको थियो ।

गत चैतसम्ममा १३ खर्ब ०९ अर्ब ५३ करोड रुपैयाँको आयात हुँदा १ खर्ब १३ अर्ब ९४ करोड रुपैयाँको निर्यात भएको गरेको विभागको तथ्याङ्क छ ।