काठमाडौं, ११ असोज । मनाङको नार–फू क्षेत्रमा पर्ने ७ हजार १२६ मिटर अग्लो हिमलुङ हिमालमा हिमपहिरो जाँदा १० जना आरोही तथा सहयोगीहरू सम्पर्कविहीन भएका छन् ।

एक्सपिडिसन अपरेटर्स एसोसिएसन नेपालका अनुसार हिमाल आरोहणका इम्याजिन नेपाल प्रालिका २ जना र हिमालयन होलिडेज नेपालका ८ जना जना हिमपहिरोमा परेर सम्पर्कविहीन भएका हुन् ।

एसोसिएसनका अनुसार घटनाको पूर्ण जानकारी भने आइसकेकेको छैन । उक्त हिमालको बेसक्याम्पमा २४ आरोही पुगेका मध्ये १० जना सम्पर्कमा नरहेको बताइएको छ ।

पर्यटन विभागले पनि घटनाबारे जानकारी पाएको र यसलाई नजिकबाट निगरानी गरिरहेको जनाएको छ । पर्यटन विभागका महानिर्देशक रामकृष्ण लामिछानेले घटनाको थप विवरण संकलन गर्ने प्रयास भइरहेको बताए ।