काठमाडौं, १२ असोज । भारतमा ककरोच जनता पार्टी (सीजेपी)ले नयाँ आन्दोलनको घोषणा गरेको छ । सीजेपीका संस्थापक अभिजीत दीपकेले सोमबार यसबारे जानकारी दिएका हुन् ।

अभिजीत दीपकेले एक्समा पोस्टर सार्वजनिक गर्दै अक्टोबर २ मा सीजेपीले मुम्बईस्थित शिवाजी पार्कमा ‘जेल भरो आन्दोलन’ गर्ने घोषणा गरेका हुन् ।

पोस्टमार्फत दीपकेले भारतका मुख्य निर्वाचन आयुक्त ज्ञानेश कुमारको राजीनामाको मागलाई दोहोर्‍याएका छन् ।

कुमारको राजीनामा माग्नुको मुख्य कारण निर्वाचन आयोगले अघि बढाएको मतदाता नामावलीको विशेष सघन पुनरावलोकन (एसआईआर) प्रक्रिया हो ।

सीजेपीले एसआईआरका क्रममा ठूलो संख्यामा मतदाताको नाम हटाइएको भन्दै आयोगको कामकारबाहीमाथि प्रश्न उठाएको छ ।

सीजेपीले यसअघि नै ज्ञानेश कुमारले आफ्नो पदबाट राजीनामा नदिए अक्टोबर २ देखि आन्दोलन सुरु गर्ने घोषणा गरिसकेको थियो । यद्यपि, गान्धी जयन्तीका दिन शिवाजी पार्कमा प्रदर्शन गर्ने सीजेपीको अनुरोधलाई मुम्बई प्रहरीले अस्वीकार गरेको थियो ।

यस विषयमा प्रतिक्रिया दिँदै दीपकेले जनताको आवाज दबाउने यस्ता प्रयास स्वीकार्य नहुने बताएका थिए ।