काठमाडौं, १२ असोज । मनाङको हिम्लुङ हिमालमा आइतबार गएको हिमपहिरोमा परेर सम्पर्कविहीन भएकाहरूको खोजी तथा उद्धार कार्य सोमबार बिहानैदेखि तीव्र पारिएको छ ।

सम्भावित क्षेत्रमा हेलिकोप्टरमार्फत खोजी गर्नुका साथै उद्धार टोली घटनास्थलमै पुगेर सम्पर्कविहीनको अवस्था पत्ता लगाउने प्रयास गरिरहेको छ । सुरक्षाकर्मी तथा सम्बन्धित उद्धार टोलीलाई समेत परिचालन गरिएको मनाङ प्रशासनले जनाएको छ ।

हिमपहिरोपछि १० जना सम्पर्कविहीन रहेको प्रारम्भिक विवरण आए पनि उनीहरूको यकिन संख्या भने अझै पुष्टि भइसकेको छैन। प्रशासनले घटनासम्बन्धी थप विवरण संकलन गर्दै सम्पर्कविहीनहरूको अवस्था पहिचान गर्ने काम भइरहेको जनाएको छ ।

यसअघि आइतबार हिमपहिरोमा परेका दुई जनाको शव चामे ल्याइएको थियो । मनाङका सहायक प्रमुख जिल्ला अधिकारी कृष्णप्रसाद पौडेलका अनुसार ती दुवै शव काठमाडौं ल्याएर शिक्षण अस्पताल महाराजगञ्जमा राखिएको छ ।