24 Views
काठमाडौं, २३ मंसिर । कैलालीमा करिब १२ ग्राम लागूऔषध खैरो हेरोइनसहित ७ जनालाई प्रहरीले पक्राउ गरेको छ । लागुऔषध ब्युरो धनगढी, जिल्ला प्रहरी कार्यालय कैलाली र मातहतबाट खटिएको प्रहरी टोलीले खैरो हेरोइनसहित उनीहरुलाई पक्राउ गरेको हो ।
पक्राउ पर्नेमा धनगढी उपमहानगरपालिका–४ बस्ने २७ वर्षीय महेश भट्ट, वडानम्बर ७ बस्ने १८ वर्षीय राजेश राना र २५ वर्षीय राम गोपाल राना रहेका छन् । भट्टलाई दुई ग्राम ४७० मिलिग्राम, रानालाई एक ग्राम ३४० मिलिग्राम खैरो हेरोइनसहित पक्राउ गरिएको जिल्ला प्रहरी कार्यालयका प्रहरी नायब उपरीक्षक(डीएसपी) कबिन्द्रसिंह बोहराले जानकारी दिए ।
यस्तै, जानकी गाउपालिका–९ खैरीफाटा बस्ने १९ वर्षीय सचिन रावललाई शंका लागि चेकजाँच गर्दा तीन ग्राम ९८० मिलिग्राम खैरो हेरोइनसहित पक्राउ गरिएको प्रहरीले जनाएको छ ।
प्रहरीका अनुसार धनगढी उपमहानगरपालिका–४ यातायात कार्यालय नजिक बस्ने २८ वर्षीय गोपाल रामजालीमगरलाई ५१० मिलिग्राम, वडा नम्बर ८ संगम टोल बस्ने २८ वर्षीय सुरेश चौधरीलाई एक ग्राम ५९० मिलिग्राम र वडा नम्बर १ बस्ने २८ वर्षीय मनिष चौधरीलाई एक ग्राम ८४० मिलिग्रामसहित पक्राउ गरिएको छ ।
सातै जनाबाट बरामद गरिएको लागुऔषध खैरो हेरोइनको तौल ११ ग्राम ७३० मिलिग्राम रहेको प्रहरीले जनाएको छ ।
