68 Views

काठमाडौं, २८ कार्तिक । कपिलवस्तुमा पशुलाई निर्दयी व्यवहार गरेको आरोपमा प्रहरीले चार जनालाई पक्राउ गरेको छ ।

पक्राउ पर्नेमा विराटनगर उपमहानगरपालिका–३ मानगणका ३८ वर्षीय हेम श्रेष्ठ, सोही ठाउँका २७ वर्षीय रमेश श्रेष्ठ, सुनसरीको कुसाहा नगरपालिका–१३ नहरचोकका ५५ वर्षीय इसाद आलम र सोही ठाउँका २७ वर्षीय समिम आलम छन् ।

उनिहरुलाई मंगलबार दिउँसो इलाका प्रहरी कार्यालय गोरुसिंगे कपिलवस्तुले बुद्धभूमि नगरपालिका–२ पूर्वपश्चिम राजमार्गबाट पक्राउ हो । इलाका प्रहरी कार्यालय गोरूसिंगेबाट खटिएको टोलीले बा. प्र. ०३–००१ ख १९९२ नम्बरको ट्रक शंका लागेर जाँच गरेको थियो । ट्रकभित्र २४ वटा गोरू थिए । गोरूका पुच्छर बाँधेर झुण्ड्याइएको, नाक डोरीले छेडिएको अवस्थामा फेला परेको प्रहरीले जनाएको छ ।

२४ वटा गोरुलाई यातना हुने गरी पुच्छर समेत बाँधेर, मुन्टो ठाडो पारेर नथीमा बाँधेर ओसारपसार गरेको पाइएको प्रहरीले जनाएको छ ।

जसमध्ये २ वटा गोरुको सिंङबाट रगत समेत आएको थियो । त्रिपालले पुरै ट्रक छोपेकाले गोरुलाई स्वासप्रस्वासमा समेत समस्या आएको बताइएको छ । पक्राउ परेकाहरुलाई जिल्ला प्रशासन कार्यालयबाट ७ दिनको म्याद लिई अनुसन्धान अघि बढाइएको छ ।