काठमाडौं, १५ फागुन । कारोबारको अन्तिम दिन बिहीबार नेपाल स्टक एक्सचेन्ज (नेप्से) परिसूचक बढेको छ । आज नेप्से परिसूचक ४९ दशमलव १५ अङ्कले बढेर दुई हजार ८१५ दशमलव ०४ बिन्दुमा कायम भएको हो ।

आज २ करोड ६१ लाख ९९ हजार ७८० कित्ता शेयर किनबेच हुँदा ११ अर्ब ३९ करोड २४ लाख रुपैयाँ बराबरको कारोबार भएको छ । अघिल्लो कारोबार दिन मंगलबार ९ अर्ब ९० करोड ९३ लाख रुपैयाँको कारोबार भएको थियो ।

आज १८६ धितोपत्रको शेयर मूल्य बढ्दा ५२ को घटेको छ । यस्तै ६ धितोपत्रको भने स्थिर रह्यो । यसदिन कुल ३०० धितोपत्र कारोबारमा आएका छन् ।

बिहीबार सबै उपसमूहको परिसूचक बढेको छ । जसमध्ये बैंकिङ उपसमूहको परिसूचक सर्वाधिक ३ दशमलव ३२ प्रतिशतले बढेको छ । त्यस्तै उत्पादन तथा प्रशोधनको २ दशमलव ९१, विकास बैंकको १ दशमलव ५३, लगानी १ दशमलव २५, होटेल तथा पर्यटनको १ दशमलव १२ र हाइड्रोपावर उपसमूहको शेयर मूल्य १ दशमलव ८ प्रतिशतले बढेको छ ।

आज अपर हेवाखोला हाइड्रोपावर र गार्डियन माइक्रोलाइफ इन्स्योरेन्सको शेयर मूल्यमा सकारात्मक सर्किट लागेको छ । यसदिन दोर्दीखोला हाइड्रोपावरको र सिन्धु विकास बैंकको शेयर मूल्य ९ दशमलव ९९ प्रतिशतले बढेको छ ।

भूगोल इनर्जीको ७ दशमलव १७ र उपकार लघुवित्तको ६ दशमलव २५ प्रतिशत शेयर मूल्यमा ह्रास आएको छ ।