काठमाडौं, १९ पुस । गार्डियन माइक्रो लाइफ इन्स्योरेन्सले यहीँ पुस २१ गतेदेखि सर्वसाधारण लगानीकर्ताका लागि प्राथमिक शेयर (आइपिओ) निष्कासन गर्ने भएको छ ।

कम्पनीले जारी पुँजी ७५ करोड रुपैयाँ बराबरको ३० प्रतिशतले हुन आउने २२ करोड ५० लाख रूपैयाँको २२ लाख ५० हजार कित्ता शेयर आइपिओ निष्कासन गर्न लागेको हो । जसमध्ये कम्पनीले १८ करोड ४५ लाख रूपैयाँ बराबरको १८ लाख ४५ हजार कित्ता शेयर सर्वसाधारणका लागि निष्कासन गर्ने भएको हो ।

त्यस्तै कम्पनीले कर्मचारीहरूका लागि ३ प्रतिशतले हुन आउने ६७ हजार ५०० कित्ता शेयर र ५ प्रतिशतले हुन आउने १ लाख १२ हजार ५०० कित्ता शेयर म्युचुअल फण्डहरूलाई छुट्याएको छ । कम्पनीले यसअघि नेपाल सरकारको सम्बन्धित निकायको श्रम स्वीकृति लिई वैदेशिक रोजगारीमा रहेका नेपालीहरूका लागि १० प्रतिशतले हुन आउने २ करोड २५ लाख रूपैयाँ बराबरको २ लाख २५ हजार कित्ता शेयर निष्कासन गरिसकेको छ ।

सो आइपिओमा न्यूनतम १० कित्ता र अधिकतममा १ लाख कित्तासम्म आवेदन दिन सकिनेछ । कम्पनीको आइपिओका लागि पुस २४ गतेसम्म आवेदन दिन सकिनेछ ।