काठमाडौं, १० चैत । यो युग हो पैसा र प्रविधिको । समयसँगै वित्तीय प्रणाली परिष्कृत हुँदै गएको छ , जसका कारण डिजिटल बैंकिङ, लगानी, बीमा र सहकारीजस्ता क्षेत्रहरूको प्रभाव बढ्दै गएको छ । यस्ता वित्तीय पक्षहरूको सही सदुपयोग गर्न आवश्यक पर्ने ज्ञान प्रचारप्रसारका लागि सप्ताहव्यापी रूपमा ‘ग्लोबल मनी विक’ कार्यक्रम सञ्चालनमा आयो, जुन आज सकिँदै छ ।

ग्लोबल मनी विकअन्तर्गत हुने कार्यक्रमको सोमवार उद्घाटन गर्दै गभर्नर महाप्रसाद अधिकारीले वित्तीय साक्षरता सबैलाई उत्तिकै अत्यावश्यक रहेको बताए । पैसा कसरी सदुपयोग गर्ने र त्यसबाट अधिकतम लाभ कसरी लिने भन्ने ज्ञान, शीप भए मानिसको जीवन र समुदायले वित्तीय तथा आर्थिक समृद्धि हासिल गर्न सक्ने विश्वास गभर्नर अधिकारीको छ ।

ग्लोबल मनी विक एक वैश्विक चेतना अभिवृद्धि अभियान हो, जसको उद्देश्य प्रारम्भिक उमेरदेखि नै युवाहरूलाई वित्तीय रूपमा सचेत बनाउनु हो । सानो उमेरदेखि वित्तीय ज्ञान दिलाउन विद्यालय पाठ्यक्रममै वित्तीय साक्षरताको विषय समावेश गर्नुपर्ने बहस पनि हुँदै आएको छ । यस्तै पछिल्लो समय डिजिटल बैंकिङसँगै यसको सुरक्षित कारोबारमा सजग हुनुपर्नेमा जोड दिइएको छ ।