काठमाडौं, २३ वैशाख । सरकारले विभिन्न २९ वटा हिमालबाट १ अर्ब १७ करोड रुपैयाँ बढी रोयल्टी संकलन गरेको छ ।

पर्यटन विभागले बुधबार सार्वजनिक गरेको तथ्याङ्कअनुसार शरद ऋतुमा आरोहीहरुबाट ती हिमालबाट आरोहणबापत १ अर्ब १७ करोड ५५ लाख रुपैयाँ रोयल्टी संकलन गरेको हो । यो रोयल्टी सन् २०२६ मार्च १ देखि मे ५ सम्म संकलन गरिएको हो ।

सरकारले विश्वकै सर्वोच्च शिखर सगरमाथाबाट सबैभन्दा धेरै रोयल्टी संकलन गरेको छ । चालु आरोहण सिजनमा सर्वोच्च शिखर सगरमाथाबाट मात्रै १ अर्ब १ करोड २८ लाख रुपैयाँ रोयल्टी संकलन गरेको हो ।

विभागका अनुसार मंगलबारसम्म सगरमाथा आरोहणमा कुल ४७ समूहका ४ सय ६४ आरोहीले अनुमति लिएका छन् ।
सगरमाथापछि यस वर्ष ल्होत्से हिमालमा ९ समूहका १ सय ११ आरोहीले अनुमति लिएका छन् । अमादब्लममा ९ समूहका १ सय ४ आरोहीले अनुमति लिएका छन् ।

यो सिजनमा २९ वटा हिमाल आरोहण गर्न १२७ वटा समूहले अनुमति लिएका छन् । ती समूहका ८११ जना पुरुष र २६१ जना महिला गरी कुल १ हजार ७२ जनाले हिमाल आरोहणका लागि अनुमति पाएका छन् ।

यस वर्ष कुल ७९ मुलुकका आरोही हिमाल चढ्न नेपाल आएको तथ्यांकमा उल्लेख छ, जसमा सबैभन्दा धेरै चीनबाट १३९ र अमेरिकाबाट १३२ आरोहीले अनुमति लिएका छन् । त्यस्तै बेलायतबाट ७२, रुसबाट ६६ आरोही नेपाल आएका छन् ।