काठमाडौं, ११ पुस । नेपाली बजारमा शुक्रबार सुनचाँदीको मूल्यले नयाँ रेकर्ड बनाएको छ । मंगलबार र बुधबार बढेर नयाँ रेकर्ड बनाएको सुनको मूल्य बिहीबार भने घटेको थियो । आज फेरि सुनको मूल्य बिहीबारको तुलनामा तोलामा १ हजार ८ सय रुपैयाँले बढेर नयाँ रेकर्ड कायम गरेको हो ।

नेपाल सुनचाँदी व्यवसायी महासंघका अनुसार आज छापावाला सुन प्रतितोला २ लाख ६९ हजार ३ सय रुपैयाँमा कारोबार भईरहेको छ । अघिल्लो दिन बिहीबार सुन तोलाको २ लाख ६७ हजार ५ सय रुपैयाँमा कारोबार भएको थियो । त्यस्तै, बुधबार सुन तोलामा २ लाख ६८ हजार १०० रुपैयाँमा कारोबार हुँदै रेकर्ड ब्रेक गरेको थियो ।

त्यस्तै, आज चाँदीको मूल्य पनि बढेको छ । बिहीबार प्रतितोला ४ हजार ४ सय रुपैयाँमा कारोबार भएको चाँदी शुक्रबार बढेर ४ हजार ५६५ रुपैयाँ पुगेको महासंघले जनाएको छ, यो मूल्य हालसम्मकै उच्च हो । बुधबार चाँदी ४ हजार ४२० रुपैयाँमा कारोबार भएको थियो ।