111 Views
काठमाडौं, २८ वैशाख । नेकपा एमालेका अध्यक्ष केपी शर्मा ओलीले राष्ट्रपतिको सल्लाहकार चिरञ्जीवी नेपालमाथि प्रश्न उठाएका छन् ।
शुक्रबार एमाले संसदीय दलको बैठकमा बोल्दै अध्यक्ष एक सय रुपैयाँको नोटमा नेपालको नयाँ नक्सा राख्ने निर्णयबारे राष्ट्रपतिका आर्थिक सल्लाहकार नेपालले दिएको अभिव्यक्ति गैरजिम्मेवार भएको बताए । उनले भने, ‘नेपालले नेपालको नोटमा नेपालको नक्सा छाप्दा अर्को देश करायो । किन करायो होला अर्को देश भन्दा राष्ट्रपतिका विज्ञ सल्लाहकार भनिएकाहरू त्यो अर्को देश कराए सँगसँगै यो फलानो देशलाई उत्तेजित पार्न खोजिएको हो भन्छ, सम्माननीय राष्ट्रपतिले कस्ता र कसका मान्छेलाई जागिर खुवाएर राख्नुभएको छ ? यस्तै मान्छे राखेर तिनकै सल्लाहअनुसार, त्यस्ता मान्छे राष्ट्रपतिले राख्न मिल्छ ?’
नेपाल सरकारले एक सय रुपैयाँको नोटमा नयाँ नक्सा छाप्ने निर्णय गरेपछि नेपालले त्यसविरुद्धको अभिव्यक्ति दिएका थिए ।
यस्तै अध्यक्ष ओलीले उक्त विषयलाई संसदमा गम्भीर रुपमा उठाउने बताए । उनले राष्ट्रपतिका सल्लाहकारले राष्ट्रपतिको बोली बोल्ने भन्दै राष्ट्रपतिलाई समेत प्रश्न गरे । ‘राष्ट्रपतिजीले सुन्नु भएको छ कि छैन ? छैन भन्ने यही भनाइबाट सुन्नुस् । राष्ट्रपतिजी के भन्नुहुन्छ ? राष्ट्रपतिको आवाज हो कि होइन ? हामी सोध्न चाहन्छौं ।’
साथै उनले सरकारलाई पनि हरेक नोट र सिक्कामा अनिवार्य रुपमा नयाँ नक्सा राख्न सुझाव दिए । उनले भने, ‘हात्ती,गैंडा केके राख्नुपर्छ, राखौं, फ्रन्ट वा पृष्ठभागमा अनिवार्य रुपमा नयाँ नक्सा पनि राख्नुस् ।’
