काठमाडौं, १ साउन । आजदेखि नयाँ आर्थिक वर्ष (आव) २०८२/८३ सुरु भएको छ । आवसँगै सरकारको नयाँ बजेट पनि कार्यान्वयनमा गएको छ ।

जेठ १५ गते अर्थमन्त्री विष्णुप्रसाद पौडेलले प्रस्तुत गरेको १९ खर्ब ६४ अर्ब ११ करोड रुपैयाँको बजेट आजदेखि कार्यान्वयन हुन लागेको हो । यो आव २०८१/८२ को बजेट आकारको तुलनामा ५ दशमलव ६ प्रतिशतले बढी रहेको छ ।

चालु खर्चतर्फ ११ खर्ब ८० अर्ब, पुँजीगत खर्चतर्फ ४ खर्ब ७ अर्ब र वित्त व्यवस्थापनतर्फ ३ खर्ब ७५ अर्ब २४ करोड विनियोजन गरिएको छ ।

राजस्व, वैदेशिक सहायता, वैदेशिक र आन्तरिक ऋणबाट स्रोत जुटाएर बजेट कार्यान्वयन गर्ने तयारी अर्थ मन्त्रालयले गरिसकेको छ । साउन १ गतेबाट सबै मन्त्रालय, विभाग, निकायलाई मार्गनिर्देशनअनुसार खर्च सुरु गर्न भनिएको छ ।

सरकारले चालू आवमा ६ प्रतिशत आर्थिक वृद्धि हासिल गर्ने लक्ष्यसहित रोजगारी सिर्जना, पूर्वाधार विकास र निजी क्षेत्रको सहभागिता विस्तार गर्ने योजना अघि सारेको छ ।