काठमाडौं, ९ असोज । अस्ट्रेलियाका प्रधानमन्त्री एन्थोनी अल्बानीजले बाढीपछिको पुनर्निर्माणमा आफ्नो देश नेपाली जनताको साथमा उभिने प्रतिबद्धता जनाएका छन् ।

संयुक्त राष्ट्रसंघको महासभाको ‘साइडलाइन’मा अमेरिकाको न्युयोर्कमा स्थानीय समयानुसार बिहीबार प्रधानमन्त्री वालेन्द्र शाहसँग भेटवार्ता गरेपछि उनले यस्तो प्रतिबद्धता जनाएका हुन् ।

भेटबारे सामाजिक सञ्जालमार्फत जानकारी दिँदै प्रधानमन्त्री अल्बानिजले विपद्को यस घडीमा अस्ट्रेलिया नेपाली जनताको साथमा उभिएको स्पष्ट पारेका छन् । ‘आज संयुक्त राष्ट्रसंघमा प्रधानमन्त्री बालेन शाहसँगको भेटमा मैले प्रभावितहरूप्रति अस्ट्रेलियाको तर्फबाट गहिरो समवेदना प्रकट गरेँ र हालसम्म अस्ट्रेलियाले गरिरहेको सहायता प्रयासबारे विस्तृत जानकारी गराएँ,’ उनले भनेका छन् ।

प्रधानमन्त्री बालेनसँगको भेटमा आफूले बाढी प्रभावितप्रति अस्ट्रेलियाको गहिरो समवेदना व्यक्त गरेको उनले बताएका छन् । नेपालको बाढीमा बेपत्ता भइरहेका अस्ट्रेलियाका नागरिकका सम्बन्धमा पनि जानकारी लिएको उनले उल्लेख गरेका छन् । ‘सबैभन्दा बढी आवश्यकता भएको ठाउँमा सहयोग पु¥याउन हामी नेपालसँग मिलेर काम गरिरहनेछौँ,’ अस्ट्रेलियाका प्रधानमन्त्री अल्बानीजले भनेका छन् ।