काठमाडौं, १६ वैशाख । भन्सार विधेयक प्रतिनिधिसभाबाट पारित भएको छ ।

मंगलबार बसेको प्रतिनिधिसभाको बैठकमा उपप्रधानमन्त्री तथा अर्थमन्त्री विष्णुप्रसाद पौडेलले भन्सार विधेयक पारित गरियोस् भन्ने प्रस्ताव प्रस्तुत गरेका थिए । जसलाई सभाले पारित गरेको हो ।

यो विधेयक तत्कालीन प्रधानमन्त्री पुष्पकमल दाहाल सरकारले ल्याएको थियो । यसलाई तत्कालीन अर्थमन्त्री डा. प्रकाश शरण महतले २०८० असोज १८ मा प्रतिनिधिसभामा दर्ता गराएका थिए ।

१८ चैत २०८० मा दफावार छलफलका लागि प्रतिनिधिसभा अन्तर्गतको अर्थ समितिमा पुगेको थियो । अर्थ समितिबाट पारित भएर १४ वैशाख २०८१ मा सभामा गएको थियो ।

प्रतिनिधिसभाबाट पारित भएसँगै यो विधेयक राष्ट्रिय सभामा जानेछ । त्यहाँबाट पारित भएपछि प्रतिनिधिसभामा आएर सभामुख देवराज घिमिरेमार्फत राष्ट्रपति कार्यालय शीतलनिवास प्रमाणीकरणका लागि लगिनेछ । राष्ट्रपतिले प्रमाणीकरण गरेपछि ऐनको रुपमा कार्यान्वयनमा आउनेछ ।