काठमाडौं, ६ असोज । सवारी चालक अनुमतिपत्र (लाइसेन्स) वितरणलाई थप व्यवस्थित र सहज बनाउन त्रिपक्षीय सम्झौता गरिएको छ । मंगलबार यातायात व्यवस्था विभाग, हुलाक सेवा विभाग र सुरक्षण मुद्रण केन्द्रबीच पूर्वाधार विकास मन्त्रालयमा त्रिपक्षीय सम्झौता भएको हो ।

सम्झौताअनुसार यातायात व्यवस्था विभागले प्रयोग गर्दै आएको विद्युतीय ड्राइभिङ लाइसेन्स तथा सवारी दर्ता प्रणालीमार्फत जारी हुने लाइसेन्सको डाटा अब सोझै सुरक्षण मुद्रण केन्द्रको प्रणालीमा पुग्नेछ । डाटा प्राप्त भएपछि सुरक्षण मुद्रण केन्द्रले नै लाइसेन्स छपाइको हुने व्यवस्था गरिएको छ ।

विद्युतीय दर्ता प्रणालीबाट जारी भएका लाइसेन्स सम्बन्धित प्रदेश कार्यालयमा वितरण गर्ने वा सेवाग्राहीले इच्छाएको ठेगानामा पुर्‍याउने कार्यलाई व्यवस्थित गर्न यो सम्झौता गरिएको बताइएको छ ।