काठमाडौं, ११ साउन । पछिल्लो एक वर्षमा अलैँची निर्यात उल्लेख्य बढेको छ । नेपालबाट गत आर्थिक वर्ष (आव) २०८२/८३ मा भएको अलैँची निर्यात अघिल्लो आवको तुलनामा ६४ दशमदव ६० प्रतिशतले बढेको छ ।

भन्सार विभागको तथ्याङ्क अनुसार गत आवमा १२ अर्ब ६४ करोड ७८ लाख मूल्य बराबरको ६ हजार ३९५ मेट्रिक टन अलैँची निर्यात भएको छ । अघिल्लो आव २०८१/८२ मा ७ अर्ब ६८ करोड ३७ लाख रुपैयाँ बराबरको ४ हजार ३०१ मेट्रिक टन अलैँची निर्यात भएको थियो ।

अघिल्लो वर्षको तुलनामा गत आवमा अलैँचीको कुल निर्यात परिमाणमा ४८ दशमलव ७० प्रतिशतले वृद्धि भएको छ ।

नेपाली अलैँचीको मुख्य बजार भारत रहेको छ । आव २०८२/८३ मा भारततर्फ मात्रै १२ अर्ब ६३ करोड ६९ लाख मूल्य बराबरको ६ हजार ३८५ मेट्रिक टन अलैँची निर्यात भएको छ ।

त्यस्तै, इटालीतर्फ १ करोड ३ लाख रुपैयाँको ९ हजार ८१४ केजी अलैँची निकासी भएको तथ्याङ्कमा उल्लेख छ । रुसतर्फ ४ लाख १८ हजार र जापानतर्फ १ लाख ४५ हजार रुपैयाँ बराबरको अलैँची निकासी भएको छ ।