काठमाडौं, ३१ भदौ । सरकारले सार्वजनिक यातायातका सवारी दर्ता खुला गरेको छ । पूर्वाधार विकास मन्त्रालय, यातायात व्यवस्था विभागले सूचना जारी गर्दै असोज १ गते (भोलि)देखि लागू हुने गरी दर्ता खुला गरिएको जनाएको छ ।

विभागका अनुसार काठमाडौँ उपत्यका बाहिर मात्र दर्ता भई सञ्चालन हुने गरी विद्युतीय सार्वजनिक यात्रुवाहक सवारी साधनहरूलाई प्राथमिकता दिँदै दर्ता खुला गरिएको छ । काठमाडौँ उपत्यकाभित्र भने स्कुल बस तथा सट्टाभर्ना (पुरानो सवारी हटाई नयाँ राख्ने) को हकमा मात्र सार्वजनिक सवारी साधनको दर्ता अनुमति दिइने सूचनामा उल्लेख छ ।

यसअघि विभागले जेठ ७ गतेदेखि वातावरणलाई कारण देखाउँदै नेपालमा आयात हुने सार्वजनिक सवारी साधनहरूको दर्ता अर्को व्यवस्था नभएसम्मका लागि रोक्का गरेको थियो । पछिसाउन १८ गतेको सूचनामार्फत सार्वजनिक मालवाहक सवारी साधनको दर्ता खुल्ला गरिएको थियो । सोही निर्णयको निरन्तरता स्वरूप हाल असोज १ गतेदेखि लागू हुने गरी यात्रुवाहक विद्युतीय सवारीको दर्ता पनि खुला गरिएको हो ।