काठमाडौं, २ असोज । रसुवाको भोटेकोसीमा आएको विनाशकारी बाढीपछि सम्पर्कविहीन भएका माथिल्लो त्रिशूली–१ जलविद्युत् आयोजनाका व्यक्तिहरूमध्ये ६ जनाको शव फेला परेको छ ।

सुरक्षाकर्मीका साथै आयोजनाका प्रतिनिधिसहितको संयुक्त उद्धार टोलीले खोजी गर्ने क्रममा अडिट–३ टनेलभित्र ढलानका लागि बुनिएको डन्डीको जालीको भित्री भागमा अल्झिएको अवस्थामा ६ वटा शव फेला पारेको हो ।

उद्धार टोलीले ग्राइन्डर, ग्यास कटर र रोटरी रेस्क्यु उपकरण प्रयोग गरी शवहरू टनेलबाट बाहिर निकालेको जनाएको छ ।

टनेलभित्र हिलोले छोपिएको अवस्थामा अन्य शवजस्तो आकृति पनि देखिएको जनाइएको छ । त्यस क्षेत्रमा थप खोजी कार्य भइरहेको छ ।