काठमाडौं, २ असोज । हेटौँडाबाट काठमाडौँ आवतजावतका लागि प्रयोग हुने त्रिभुवन राजपथ (बाइरोड) र कान्ति राजमार्गमा आजदेखि नियमित रूपमा दुईतर्फी रूपमा सञ्चालनमा आएका छन् ।

जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीले पृथ्वी राजमार्गअन्तर्गत धादिङको कृष्णभीर खण्डमा अवरुद्ध सडक सञ्चालनमा आएसँगै दुवै मार्गमा दुईतर्फी सवारी आवागमन खुला गरिएको जानकारी दिए ।

गत भदौ १६ गतेदेखि एकतर्फी गरिएको त्रिभुवन राजपथ र कान्ति लोकपथलाई १७ दिनपछि शुक्रबारदेखि दुईतर्फी सवारी सञ्चालनका लागि खुला गरिएको हो ।

पृथ्वी राजमार्गअन्तर्गत धादिङ जिल्लाको कृष्णभीरमा पहिरोका कारण उक्त राजमार्ग अवरुद्ध भएपछि हेटौँडा हुँदै काठमाडौँ जाने मार्गमा सवारी चाप बढेको थियो । त्यसपछि जिल्ला प्रशासन कार्यालय मकवानपुरले त्रिभुवन राजपथ र कान्ति लोकपथलाई एकतर्फी सञ्चालनको व्यवस्था गरेको थियो ।

१० चक्कासम्मका मालवाहक तथा ठुला यात्रुवाहक सवारी साधन त्रिभुवन राजपथ हुँदै काठमाडौँतर्फ आउने र फर्किंदा कान्ति लोकपथ हुँदै हेटौँडा जाने व्यवस्था मिलाइएको थियो ।