काठमाडौं, २९ असार । नेपाल बीमा प्राधिकरणले बीमा दाबी भुक्तानीमा कुनै पनि प्रकारको समस्या देखिएमा वा बीमा कम्पनीहरूले समयमै भुक्तानी नगरेमा प्रमाणसहित उजुरी दिन सर्वसाधारणहरूलाई आग्रह गरेको छ ।

केही बीमक, बीमकका कर्मचारी तथा सर्भेयरले बीमासम्बन्धी कानुन, नियामकीय व्यवस्था तथा व्यावसायिक आचारसंहिता विपरीत काम गरेको गुनासा आएपछि प्राधिकरणले सर्वसाधारणलाई सूचनामार्फत उजुरी दिन आग्रह गरेको हो । प्राधिकरणले कारबाहीका लागि प्रमाणसहित उजुरी पेस गर्न भनेको छ ।

प्राधिकरणका अनुसार बीमक (बीमा कम्पनी), बीमकका कर्मचारी वा सर्भेयरले बीमा सम्बन्धी प्रचलित कानुन, नियामकीय व्यवस्था तथा व्यावसायिक आचारसंहिता विपरीत कार्य गरेको पाइएमा कारबाही प्रक्रिया अघि बढाइनेछ । यदि कुनै पनि पक्षले दुःख दिएको, गलत विवरण तयार पारेको, तथ्य लुकाएको वा तोडमोड गरेको, पक्षपातपूर्ण मूल्यांकन गरेको वा अनुचित लाभ लिएको पाइएमा बिमा ऐन, २०७९ बमोजिम कारबाहीका लागि उजुरी दिन भनिएको छ ।

उजुरी दर्ता गर्दा उजुरीकर्ताको नाम, ठेगाना तथा सम्पर्क नम्बर, सम्बन्धित बीमा कम्पनीको नाम, परेको समस्याको विस्तृत बेहोरा, बीमा दाबी नम्बर तथा बीमालेख (पोलिसी) नम्बर र दाबी पुष्टि हुने आवश्यक कागजात, फोटो, भिडियो वा अन्य कुनै प्रमाण पेस गर्नुपर्ने सूचनामा उल्लेख छ ।

सर्वसाधारणले माध्यमबाट प्राधिकरणमा आफ्ना उजुरी दर्ता गराउन सक्नेछन् । ललितपुरको कुपन्डोलस्थित बीमा प्राधिकरणको केन्द्रीय कार्यालयको दर्ता शाखामा प्रत्यक्ष उपस्थित भई उजुरी दिन सकिने छ । त्यस्तै, प्राधिकरणको आधिकारिक इमेल ठेगानामा वा बीमा प्राधिकरण कार्यालयमा उजुरी पठाउन सकिने सूचनामा उल्लेख छ ।