काठमाडौं, ११ जेठ । नेपाली नागरिकहरूका लागि श्रीलंका भ्रमण गर्न अब पर्यटक भिसा शुल्क नलाग्ने भएको छ ।

काठमाडौंस्थित श्रीलंकाली दूतावासले एक विज्ञप्ति जारी गर्दै नेपालीहरूका लागि निःशुल्क पर्यटक भिसा (इलेक्ट्रोनिक ट्राभल अथोराइजेसन–ईटीए) को व्यवस्था लागू गरिएको जानकारी दिएको हो ।

नयाँ व्यवस्था अनुसार पर्यटन उद्देश्यले श्रीलंका जाने नेपाली नागरिकले २५ मे २०२६ देखि ३० दिन अवधिको दुई पटकसम्म प्रवेश गर्न मिल्ने (डबल इन्ट्री) पर्यटक भिसा निःशुल्क प्राप्त गर्न सक्नेछन् ।

श्रीलंका सरकारले नेपालसहित विश्वका ४० देशका नागरिकहरूलाई लक्षित गर्दै यो नयाँ र आकर्षक सुविधा उपलब्ध गराउने निर्णय गरेको हो ।

यसअघि नेपालीहरूले श्रीलंकाको पर्यटक भिसाका लागि निश्चित शुल्क तिर्नुपर्ने बाध्यता थियो । श्रीलंका सरकारको यस कदमले दुई देशबीचको कूटनीतिक र पर्यटकीय सम्बन्धलाई थप मजबुत र सुमधुर बनाउने अपेक्षा गरिएको छ ।