काठमाडौं, १२ जेठ । अमेरिकी सेनाले दक्षिणी इरानमा इरानी मिसाइल क्षेत्र तथा खानीहरू राख्ने प्रयास गरिरहेका डुंगरूलाई निशाना बनाउँदै नयाँ आक्रमण गरेको छ ।

अमेरिकी सेन्ट्रल कमान्डले विज्ञप्ति जारी गर्दै यी आक्रमण आत्मरक्षाका लागि गरिएको र इरानी सेनाबाट हुन सक्ने खतराबाट जोगाउन यो रणनीति तयार गरिएको बताएको छ । सेन्ट्रल कमान्डका प्रवक्ता क्याप्टेन टिम हकिन्सले अमेरिकी सेनाले जारी युद्धविरामको अवधिमा संयम अपनाउँदै आफ्ना सैनिकको सुरक्षा गरिरहेको बताएका छन् ।

इरानले हालसम्म अमेरिकी आक्रमणबारे प्रतिक्रिया दिएको छैन । तरल इरानी विदेश मन्त्रालयका प्रवक्ता इस्माइल बकाईले यसअघि युद्ध अन्त्यका लागि भएका वार्तामा केही प्रगति भएको भए पनि सम्झौता ‘तत्काल हुने अवस्थामा नरहेको’ बताएका थिए ।

यी आक्रमणहरूले अमेरिका र इरानबीच सम्भावित शान्ति सम्झौतामा कस्तो प्रभाव पार्नेछ भन्ने अझै स्ष्ट छैन ।
आक्रमणपछि अमेरिकी विदेशमन्त्री मार्को रुबियोले सम्झौता अझै सम्भव रहेको बताएका छन् । उनले मंगलबार इरानका प्रमुख वार्ताकार तथा विदेशमन्त्री र कतारका प्रधानमन्त्रीबीच हुने वार्तातर्फ संकेत गरे । भारत भ्रमणका क्रममा पत्रकारहरूसँग कुरा गर्दै रुबियोले भने, ‘हामी प्रगति गर्न सक्छौँ कि भनेर हेर्नेछौँ । प्रारम्भिक दस्तावेजको विशेष भाषाबारे धेरै छलफल भइरहेको छ, त्यसैले केही दिन लाग्न सक्छ ।’

कप्तान हकिन्सका अनुसार अमेरिकी आक्रमणले दक्षिणी बन्दरगाह शहर बन्दर अब्बास नजिकको क्षेत्रलाई निशाना बनाएको थियो । त्यहाँ इरानी नौसैनिक अड्डा रहेको छ र यो होर्मुज जलमार्गमध्यको किनारमा अवस्थित छ ।

इरानी सरकारी सञ्चारमाध्यमले यसअघि बन्दर अब्बासमा विस्फोटको आवाज सुनिएपछि स्थानीय अधिकारीहरूले अनुसन्धान गरिरहेको बताएका थिए । सप्ताहन्तमा ट्रम्पले दुवै पक्ष सम्झौतामा नजिक पुगेको संकेत दिएका थिए। तर पछि उनले वार्ताकारहरूलाई हतार नगर्न निर्देशन दिएको बताए । रुबियोले पनि सोमबार नै सम्झौता सम्भव हुन सक्ने बताएका थिए ।

तर बकाईले प्रतिक्रिया दिँदै भने, ‘हामीले छलफलका धेरै विषयमा निष्कर्षमा पुगेका छौँ भन्ने कुरा सही हो । तर यसको अर्थ सम्झौता तुरुन्तै हस्ताक्षर हुन लाग्यो भन्ने दाबी कसैले गर्न सकिदैन ।’

छलफल भइरहेको समझदारी पत्रमा ६० दिनको युद्धविराम विस्तार, होर्मुज जलमार्ग पुनः खोल्ने र इरानको आणविक कार्यक्रमबारे थप वार्ताको योजना समावेश भएको बताइएको छ ।