काठमाडौं, १० जेठ । एभरेष्ट कलर लिमिटेडले सर्वसाधारणका लागि जेठ २२ गतेदेखि आईपीओ बिक्री खुला गर्ने भएको छ । यसअघि वैदेशिक रोजगारीमा रहेका नेपालीलाई छुट्याइएको शेयर बाँडफाँट सम्पन्न गरेपछि कम्पनीले अब आम लगानीकर्ताका लागि शेयर निष्काशन प्रक्रिया अघि बढाएको हो ।

कम्पनीले ३० करोड रुपैयाँ जारी पूँजीको २६ दशमलव ३३ प्रतिशत बराबरको ७ लाख ९० हजार कित्ता आईपीओ निष्काशन गर्न नेपाल धितोपत्र बोर्डबाट अनुमति पाएको थियो । कुल निष्काशनमध्ये ७९ हजार कित्ता शेयर वैदेशिक रोजगारीमा रहेका नेपालीलाई छुट्याइएको थियो, जसको बाँडफाँट भइसकेको कम्पनीले जनाएको छ ।

यस्तै, ३९ हजार ५०० कित्ता शेयर सामूहिक लगानी कोष र १५ हजार ८०० कित्ता शेयर कर्मचारीका लागि सुरक्षित गरी वितरण गरिएको छ ।

अब बाँकी रहेको ६ लाख ५५ हजार ७०० कित्ता शेयर सर्वसाधारणका लागि सार्वजनिक निष्काशनमा ल्याउन लागिएको हो । उक्त शेयरको प्रतिकित्ता मूल्य १०० रुपैयाँ तोकिएको छ । यसअनुसार कम्पनीले ६ करोड ५५ लाख ७० हजार रुपैयाँ बराबरको आईपीओ बिक्री गर्न लागेको हो ।

लगानीकर्ताले न्यूनतम १० कित्ता र अधिकतम १० हजार कित्तासम्मका लागि आवेदन दिन सक्नेछन् । आवेदन अवधि जेठ २७ गतेसम्म कायम रहनेछ । सो अवधिमा सम्पूर्ण शेयर बिक्री नभएमा निष्काशन अवधि असार ५ गतेसम्म थप गरिने कम्पनीले जनाएको छ ।