काठमाडौं । सर्वोच्च अदालतमा नवनियुक्त प्रधानन्यायाधीश डा. मनोजकुमार शर्माले पदभार ग्रहण गरेसँगै वरिष्ठतम न्यायाधीश सपना मल्ल प्रधान बिदामा बसेकी छन् । सर्वोच्च अदालतका प्रवक्ता अर्जुनप्रसाद कोइरालाका अनुसार न्यायाधीश प्रधानले आफ्नै स्वीकृतिमा बुधबारदेखि लागू हुने गरी २० दिनको बिदा लिएकी हुन् ।

प्रधानन्यायाधीश शर्माले मंगलबार पदभार ग्रहण गर्न सर्वोच्च अदालत पुग्नुअघि नै मल्लले बिदा स्वीकृत गरेकी थिइन् । यसअघि तत्कालीन प्रधानन्यायाधीश प्रकाशमानसिंह राउत उमेरहदका कारण अवकाश भएपछि मल्लले २०८२ चैत १८ गतेदेखि कामु प्रधानन्यायाधीशको जिम्मेवारी सम्हाल्दै आएकी थिइन् ।

संवैधानिक परिषद्ले प्रधानन्यायाधीश पदका लागि शर्माको नाम सिफारिस गरेपछि न्यायाधीश मल्ल असन्तुष्ट रहेको चर्चा न्यायालयभित्र चलिरहेको थियो । सिफारिस भएको दोस्रो दिन कामु प्रधानन्यायाधीशको हैसियतमा मल्लले फुलकोर्ट बैठक बोलाएकी थिइन् ।

उक्त बैठकमा प्रधानन्यायाधीश सिफारिसको विषयलाई लिएर न्यायाधीशहरूबीच चर्काचर्की भएको बताइएको थियो । त्यसपछि शर्मा वैशाख २५ गतेदेखि इजलासमा सहभागी भएका थिएनन् ।