काठमाडौं, १३ वैशाख । हाल नेपालमा पश्चिमी र स्थानीय वायूको साथै नेपालको पूर्वी भू–भाग नजिक तल्लो वायूमण्डलमा रहेको न्यून चापीय क्षेत्रको आंशिक प्रभाव रहेको जल तथा मौसम विज्ञान विभागले जनाएको छ ।

यसैका कारण अहिले लुम्बिनी प्रदेश लगायत बाँकी हिमाली र पहाडी भू–भाग आंशिक बादल लागेको छ भने बाँकी तराई भू–भागमा मौसम मूख्यतया सफा रहेको छ । कोशी प्रदेशको एक–दुई स्थानमा मध्यम सम्मको वर्षा तथा हिमपात भइरहेको छ ।

विभागका अनुसार आज दिउँसो कोशी, बागमती र गण्डकी प्रदेशको केही स्थानहरूमा तथा मधेश प्रदेश लगायत लुम्बिनी, कर्णाली र सुदुरपश्चिम प्रदेशको पहाडी र हिमाली भू–भागका थोरै स्थानहरूमा साथै लुम्बिनी प्रदेशको तराई भू–भागका एक–दुई स्थानमा मेघगर्जन र चट्याङ्गसहित मध्यम सम्मको वर्षा तथा हिमपातको सम्भावना रहेको छ । लुम्बिनी र सुदूरपश्चिम प्रदेशका तराई भू–भागमा तातो दिन हुने सम्भावना रहेको विभागले जनाएको छ ।
त्यस्तै, आज राती कोशी, मधेश, बागमती र गण्डकी प्रदेश लगायत बाँकी हिमाली भू–भागका थोरै स्थानहरूमा मध्यम सम्मको वर्षा तथा हिमपातको सम्भावना रहेको छ ।