काठमाडौं, ८ वैशाख । माउन्ट एभरेष्ट पावर डेभलपमेन्ट लिमिटेडले आगामी वैशाख १७ गतेदेखि प्रारम्भिक सार्वजनिक निष्काशन (आईपीओ) जारी गर्ने तयारी गरेको छ । कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूलाई लक्षित गर्दै शेयर निष्काशन गर्न लागेको हो ।

कम्पनीले जारी पूँजी ८६ करोड रुपैयाँको ३० प्रतिशत बराबर २५ करोड ८० लाख रुपैयाँ मूल्यका २५ लाख ८० हजार कित्ता शेयर निष्काशन गर्ने अनुमति पाएको छ । यसमध्ये ८ लाख ६० हजार कित्ता शेयर (८ करोड ६० लाख रुपैयाँ) आयोजना प्रभावित क्षेत्रका स्थानीयका लागि छुट्याइएको छ ।

उक्त स्थानीय शेयरमध्ये ३ लाख ४४ हजार कित्ता सोलुखुम्बु जिल्लाको सोलुदुधकुण्ड नगरपालिका वडा नं. १ र २ का अति प्रभावित बासिन्दालाई वितरण गरिनेछ भने बाँकी ५ लाख १६ हजार कित्ता अन्य प्रभावित क्षेत्रका बासिन्दालाई बाँडफाँट गरिने कम्पनीले जनाएको छ ।

यस्तै, सर्वसाधारणका लागि छुट्याइएको मध्ये १० प्रतिशत अर्थात १ लाख ७२ हजार कित्ता शेयर वैदेशिक रोजगारीमा रहेका नेपालीहरूका लागि निष्काशन गरिनेछ । यसको मूल्य १ करोड ७२ लाख रुपैयाँ हुनेछ ।

लगानीकर्ताले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन् । स्थानीय बासिन्दाका लागि आईपीओ छिटोमा वैशाख ३१ गतेसम्म र ढिलोमा जेठ १८ गतेसम्म खुला रहनेछ । वैदेशिक रोजगारीमा रहेका नेपालीका लागि भने आवेदन अवधि छिटोमा बैशाख २३ गते र ढिलोमा वैशाख ३१ गतेसम्म तोकिएको छ ।