डोल्पामा हिमपातमा फसेका ६ भारतीय पर्यटकको हेलिकोप्टरबाट उद्धार गरिँदै
अनलाइनसमय |
काठमाडौं, १५ कात्तिक । भारी हिमपातका कारण डोल्पाको शे–फोक्सुण्डो गाउँपालिका–८ स्थित दानीगढमा फसेका ६ जना भारतीय पर्यटकको हेलिकोप्टरमार्फत उद्धार भइरहेको छ ।
जिल्ला प्रशासन कार्यालय डोल्पाका अनुसार केही दिनदेखि लगातार हिमपात भएपछि पर्यटकहरू उक्त क्षेत्रमा फसेका हुन् ।
डोल्पाका प्रमुख जिल्ला अधिकारी जुनु हमाल ढकालका अनुसार पर्यटकहरू फसेको जानकारी शनिबार (कात्तिक १४) प्राप्त भएको थियो । उनीहरूको उद्धारका लागि आजदेखि प्रयास भइरहेको उनले बताइन् ।
उद्धार गर्न लागिएका पर्यटकमा मौमिता हल्दर, पियाली कोले, जजला त्रिवेद कुमार, आदित्य सिंह, दिपलिना विश्वास र राजेश दे रहेका छन् ।
यसैबीच, प्रतिकूल मौसमका कारण थप जोखिम निम्तिन सक्ने भन्दै जिल्ला प्रशासन कार्यालयले जिल्लावासी तथा पर्यटकलाई सतर्कता अपनाउन आग्रह गरेको छ ।
