काठमाडौं, १४ असोज । यस वर्षको दसैं र तिहारका लागि नागरिकले राष्ट्र बैंक र बैंक तथा वित्तीय संस्थाबाट नयाँ नोट साट्न पाउने भएका छन् ।

विगतमा जस्तो सूचना निकालेर निश्चित दिन तोकेर नयाँ नोट वितरण नगरेपनि साट्न आउने नागरिकका लागि त्यो सुविधा निरन्तर उपलब्ध गराइएको राष्ट्र बैंकले जनाएको छ ।

नागरिकले आफूलाई पायक पर्ने बैंक तथा वित्तीय संस्थाका शाखामार्फत पनि नयाँ नोट साट्न सक्ने राष्ट्र बैंकले जानकारी दिएको छ ।

राष्ट्र बैंक मुद्रा व्यवस्थापन विभागका अनुसार यस वर्ष कुनै तामझाम र उत्सवबिना नोट सटही गर्न चाहनेका लागि राष्ट्र बैंकले थापाथलीस्थित कार्यालय र बैंक तथा वित्तीय संस्थामार्फत नयाँ नोट सटही सुविधा दिन लागेको हो ।