काठमाडौं, १५ जेठ । विभिन्न माध्यमबाट कम्बोडिया पुगेर भिसाको समयावधि समाप्त भएपछि पनि गैरकानुनी रूपमा बसोबास गर्दै आएका ६०२ जना नेपाली नागरिकहरूको जरिबाना कम्बोडिया सरकारले मिनाहा गरेको छ ।

बैंककस्थित नेपाली राजदूतावासको अनुरोधमा कम्बोडिया सरकारले विभिन्न चरणमा गरी आठौँ पटकसम्ममा ती नेपालीहरूको भिसा अवधि नाघेपछि लाग्ने जरिबाना मिनाहा गरिदिएको हो ।

दूतावासले भिसा अवधि सकिएका सबै नेपालीलाई कम्बोडिया छोडेर एक हप्ताभित्रै स्वदेश फर्किन अनुरोध गरेको छ । तोकिएको समयमा स्वदेश नफर्किनेहरूलाई कम्बोडिया सरकारले नयाँ कानुनअनुसार जरिबाना तथा कैद सजाय गर्नेछ ।

कम्बोडियाले ल्याएको नयाँ कानुनमा अवैधरूपमा सञ्चालित अनलाइन स्क्यामिङ सेन्टरमा काम गर्ने विदेशी र भिसा अवधि सकिएपछि पनि बस्ने विदेशीलाई पाँच लाख अमेरिकि डलरसम्म जरिबाना र आजीवन कैदसम्मको सजाय हुने व्यवस्था गरेको छ ।