काठमाडौं, ६ चैत । बुद्धभूमि नेपाल हाइड्रोपावर कम्पनी लिमिटेडले चैत २२ गतेदेखि हकप्रद शेयर बिक्री खुला गर्ने घोषणा गरेको छ । कम्पनीले हालको शेयरधनीहरूका लागि १०० प्रतिशत हकप्रद शेयर जारी गर्न लागेको हो, जसअनुसार प्रत्येक १ कित्ता शेयरधनीले बराबर १ कित्ता नयाँ शेयर पाउनेछन् ।

यस योजनाअन्तर्गत कम्पनीले ४० करोड रुपैयाँ बराबरको ४० लाख कित्ता हकप्रद शेयर निष्काशन गर्नेछ । यसको अंकित मूल्य प्रतिशेयर १०० रुपैयाँ तोकिएको छ ।

हकप्रद शेयरका लागि कम्पनीले फागुन १ गते बुकक्लोज गरिसकेको छ । त्यसअनुसार माघ २९ गतेसम्म नेप्सेमा कारोबार भई कायम भएका शेयरधनीहरू मात्र आवेदन दिन योग्य हुनेछन् । आवेदन दिने अन्तिम मिति २०८३ साल बैशाख १३ गते तोकिएको छ ।

कम्पनीको हकप्रद निष्काशनका लागि इन्फोमेरिक्स क्रेडिट रेटिङ्ग नेपालले ‘आईआरएन डबल बी’ इस्यूअर रेटिङ्ग प्रदान गरेको छ, जसले कम्पनीको वित्तीय दायित्व पूरा गर्ने क्षमतामा मध्यम स्तरको जोखिम रहेको संकेत गर्दछ ।