काठमाडौं, २२ माघ । गत आर्थिक वर्ष २०८१/८२ (आव) को तुलनामा चालू आवमा बीमा पोलिसी सरेण्डर गर्नेको सङ्ख्या र रकम दुबै घटेको छ ।

नेपाल बीमा प्राधिकरणको तथ्याङ्कअनुसार चालू आव २०८२/८३ को ६ महिनामा ५ अर्ब ६९ करोड २१ लाख रुपैयाँको बीमा पोलिसी सरेण्डर भएको छ, जुन गत आवको सोही अवधिको तुलनामा २३ दशमलव ७७ प्रतिशतले कम हो । गत आवको पुससम्ममा यस्तो रकम ७ अर्ब ४६ करोड ६६ लाख रुपैयाँ थियो

यस्तै, पछिल्लो एक वर्ष अवधिमा बीमा पोलिसी सरेण्डर गर्नेको सङ्ख्या पनि घटेको छ । चालू आवको पुससम्ममा ५१ हजार ७७ बीमितले बीमा पोलिसी सरेण्डर गरेका छन्, जुन गत आवको सोही अवधिको तुलनामा सरेण्डरको संख्या ६ दशमलव १३ प्रतिशतले कम हो । आव २०८१/८२ को पुससम्ममा ५४ हजार ४१४ जना बीमितले बीमा पोलिसी सरेण्डर गरेका थिए ।

बीमा प्राधिकरणको नियामावली अन्तर्गत बीमितहरुले तीन वर्षसम्म निरन्तर बीमा शुल्क भुक्तानी गरेपछि मात्रै बीमालेख सरेण्डर गर्न पाउने व्यवस्था छ । बीमा पोलिसी खरिद गरी तोकिएको अवधि पूरा नभई पोलिसी त्याग्नुलाई बीमा ‘सरेण्डर’का रुपमा बुझिन्छ । बीमितले समय–समयमा बीमा प्रिमियम बुझाउनुपर्छ, तर केही कारणवश यदि प्रिमियम तिर्न छोडेर रकम फिर्ता लिन चाहन्छ भने त्यसलाई सरेण्डर मानिन्छ ।