काठमाडौं, २८ पुस । अमेरिकी राष्ट्रपति डोनाल्ड ट्रम्पले आफूलाई भेनेजुएलाको कार्यवाहक राष्ट्रपति घोषणा गरेका छन् । उनले आइतबार आफ्नो सामाजिक सञ्जाल ‘ट्रुथ सोसल’मा एक तस्बिर पोस्ट गर्दै यो दाबी गरेका हुन् ।

पोस्ट गरेको तस्बिर विकिपेडियामा रहेको ट्रम्पको प्रोफाइल पेजको एडिट गरिएको अंश हो, जसमा क्याप्सनमा ’भेनेजुएलाको कार्यवाहक राष्ट्रपति’ लेखिएको छ । साथै सन् २०२६ को जनवरीसम्म उनलाई भेनेजुएलाको वर्तमान राष्ट्रपतिको रूपमा देखाइएको छ ।

अमेरिकाले भेनेजुएलामाथि आक्रमण गरेको एक हप्ता भन्दा कम समयमै यो विवादित बयान आएको हो । ३ जनवरीमा अमेरिकाले भेनेजुएलामा आक्रमण गर्दै राष्ट्रपति निकोलस मादुरो र उनकी पत्नी सिलिया फ्लोरेसलाई पक्राउ गरी अमेरिकासम्म ल्याएको थियो । उनीहरूविरुद्ध हतियार र लागूपदार्थ तस्करीको आरोपमा मुद्दा चलाइएको छ ।

मादुरोको गिरफ्तारीपछि भेनेजुएलाकी पूर्व उपराष्ट्रपति डेल्सी रोड्रिगेजलाई कार्यवाहक राष्ट्रपति नियुक्त गरिएको छ । यसै राजनीतिक घटनाक्रमको बीचमा ट्रम्पले सामाजिक सञ्जालमार्फत आफूलाई भेनेजुएलाको राष्ट्रपति घोषणा गरेका छन् ।