काठमाडौं, १२ असोज । अर्थ मन्त्रालयले जेनजी युवा आन्दोलनका क्रममा जलाइएका २९ वटा सवारी साधनको मर्मत सम्भार गरेको छ । मर्मतमा झण्डै २३ लाख खर्च भएको छ ।

मन्त्रालयका अनुसार चार पाङ्ग्रे २९ वटा सवारी साधनको अप्रत्याशित र विशेष कारणबाट यथाशीघ्र मर्मत गर्न कोटेसन माग गरिएको थियो । प्राप्त प्रस्तावमध्ये जगन्नाथ अटो केयर सिनामंगल काठमाडौंले २२ लाख ७८ हजार ९५० रुपैयाँमा सबैभन्दा कम मूल्यको प्रस्ताव गरेको थियो । सो कम्पनीमार्फत सवारी साधनको मर्मत गरिएको मन्त्रालयले जानकारी दिएको छ ।

मन्त्रालयले चालू आवमा नयाँ सवारी साधन नकिन्ने निर्णय गरेको छ । निर्वाचन प्रयोजन बाहेक अन्य कुनै निकायले नयाँ गाडी किन्न पाउने छैनन् ।

गत भदौ २३ र २४ गते भएको जेनजी प्रदर्शनका क्रममा देशभर सरकारी र निजी सवारी साधनहरु आगजनी गरिएको थियो । आन्दोलनको क्रममा सवारी साधनहरुमा भएको आगजनीको पूर्ण विवरण आउन भने बाँकी छ ।

सरकारी कार्यालयहरुले संकलन गरेको प्रारम्भिक विवरण अनुसार काठमाडौंमा मात्रै १ हजार ४२ वटा सरकारी गाडी जलेर नष्ट भएका थिए, जसमध्ये ४४१ वटा चारपांग्रे र ६०१ वटा दुईपांग्रे छन् ।