काठमाडौं, २० असोज । नाइजेरियामा सैन्य विमान दुर्घटना भएको छ । बेनिन सहरबाट लागोसतर्फ उडिरहेको एउटा नाइजेरियाली सैन्य विमान सोमबार दक्षिण–पश्चिम ओन्डो राज्यमा दुर्घटनाग्रस्त हुँदा २५ जना यात्रु र सात जना चालक दलका सदस्यको मृत्यु भएको रोयटर्समा उल्लेख छ ।

राष्ट्रपति बोला तिनुबुले विमानमा कोही पनि जीवित नरहेको पुष्टि गर्दै “गहिरो दुःख“ व्यक्त गरेका छन् र विमानमा सवार व्यक्तिहरूका परिवारप्रति समवेदना प्रकट गरेका छन् ।

तिनुबुले एक विज्ञप्ति जारी गर्दै भनेका छन्, ‘वायुसेना प्रमुखले मलाई जानकारी गराउनुभएको छ, र मैले भविष्यमा यस्ता घटना हुन नदिन दुर्घटनाको कारणबारे तुरुन्तै सूक्ष्म अनुसन्धान सुरु गर्न नाइजेरियाली वायुसेनालाई निर्देशन दिएको छु ।’

हवाई यातायात नियन्त्रकहरूले सोमबार जीएमटी ०८ः१३ बजे नाइजेरियाली वायुसेनाको एटीआर ४२ विमानसँगको सम्पर्क गुमाएका थिए, जुन बेनिन सहरबाट लागोसका लागि नियमित उडानमा रहेको उड्डयन मन्त्री फेस्टस केयामोले बताएका छन् । यो दुर्घटना नाइजेरियामा हालैका वर्षहरूमा भएका सबैभन्दा घातक हवाई दुर्घटनाहरूमध्ये एक हो ।

विमानको भग्नावशेष पछि तटीय सहर इग्बोकोडा नजिकै फेला परेको थियो, जहाँ खोज तथा उद्धार टोली परिचालन गरिएको थियो ।