‘गणेश नेपालीको मृत्यु राज्यको नीतिको परिणाम’
अनलाइनसमय |
काठमाडौं, २६ असार । राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले मुगुका गणेश नेपालीको आत्मदाहपछि भएको मृत्यु राज्यको नीतिका कारण भएको आरोप लगाएका छन् ।
शुक्रबार बसेको प्रतिनिधिसभाको बैठकमा बोल्दै सांसद शाहीले काठमाडौं सबै वर्गका नागरिकको साझा शहर भएको उल्लेख गर्दै प्रधानमन्त्री बालेन्द्र (बालेन) शाहलाई प्रश्न गरेका हुन् ।
उनले काठमाडौं सहर अरबपति र करोडपतिहरूको शहर हो कि गरिब, दुःखी र निमुखा नागरिकको पनि शहर हो भन्दै संसदमार्फत प्रधानमन्त्रीसँग जवाफ माग गरे ।
सांसद शाहीले यदि काठमाडौं गरिब र विपन्न नागरिकको शहर होइन भने यो नेपालको राजधानी किन हो भन्ने प्रश्नसमेत गरे । उनले काठमाडौं देशका सबै नागरिकको आशा र भरोसाको केन्द्र भएको बताए ।
उनका अनुसार काठमाडौंमा रहेका गरिब, दुःखी र सर्वहारा वर्गका नागरिकले पनि सम्मानपूर्वक बाँच्न पाउनुपर्ने हुन्छ। उनले पछिल्लो घटनाले राज्यको नीति र व्यवहारमाथि गम्भीर प्रश्न उठाएको दाबी गरे।
सांसद शाहीले सरकारको आवश्यकता सबैभन्दा बढी विपन्न र कमजोर वर्गका नागरिकलाई पर्ने भन्दै धनी वर्गलाई मात्रै केन्द्रमा राखेर राज्य सञ्चालन गर्न नहुने बताएका छन्।
