काठमाडौं, २६ असार । त्रिपुरेश्वरस्थित राहदानी विभाग अगाडि आत्मदाह प्रयास गरेका मुगुका गणेश नेपालीको उपचारका क्रममा निधन भएको छ । घटनाको अनुसन्धानका लागि प्रहरीले काठमाडौं महानगरपालिकाका तीन नगर प्रहरीलाई नियन्त्रणमा लिएर सोधपुछ गरिरहेको जनाइएको छ ।

जिल्ला प्रहरी परिसर काठमाडौंका अनुसार नियन्त्रणमा रहेका तीनमध्ये दुई महिला र एक पुरुष नगर प्रहरी हुन् । उनीहरूलाई हाल कालीमाटी प्रहरी वृत्तमा राखेर घटनाबारे अनुसन्धान अघि बढाइएको प्रहरीले जनाएको छ ।

हिजो बिहीबार दिउँसो करिब १ः३० बजे राहदानी विभाग अगाडि गणेश नेपालीले आफ्नै शरीरमा पेट्रोल खन्याएर आगो लगाएका थिए । गम्भीर घाइते भएका उनलाई तत्काल वीर अस्पतालमा उपचारका लागि भर्ना गरिएको थियो । उपचारकै क्रममा शुक्रबार उनको मृत्यु भएको हो ।

प्रारम्भिक जानकारीअनुसार घटनाअघि राहदानी विभाग अगाडि पार्किङ गरिएको उनको मोटरसाइकलमा नगर प्रहरीले ह्विल लक गरेको थियो । त्यसपछि नगर प्रहरीसँग उनको विवाद भएको र सोही क्रममा उनले आत्मदाहको प्रयास गरेको मृतकका आफन्तले दाबी गरेका छन् ।

यद्यपि घटनाको वास्तविक कारण र परिस्थितिबारे विस्तृत अनुसन्धान भइरहेको प्रहरीले जनाएको छ ।