काठमाडौं, १९ असार । बर्डफ्लुका कारण क्षति बेहोरेका किसानलाई क्षतिपूर्ति वितरण गर्न कृषि, वन तथा वातावरण मन्त्रालयले पशुसेवा विभागलाई ५० करोड रुपैयाँ उपलब्ध गराएको छ । मन्त्रालयले रकमान्तरमार्फत उक्त रकम निकासा गरेको हो ।

बर्डफ्लु सङ्क्रमण पुष्टि भएका ११ जिल्लामा नष्ट गरिएका पन्छी, अण्डा तथा दानाको क्षतिपूर्ति उपलब्ध गराउन विभागले मन्त्रालयसँग बजेट माग गरेपछि रकम निकासा गरिएको हो ।

पशुसेवा विभागका अनुसार निकासा भएको रकमबाट प्रभावित किसानलाई प्रमाणित क्षतिको आधारमा अधिकतम ७५ प्रतिशतसम्म क्षतिपूर्ति प्रदान गरिनेछ ।

विभागले उपलब्ध गराएको विवरणअनुसार काठमाडौँ, ललितपुर, भक्तपुर, काभ्रेपलाञ्चोक, झापा, मोरङ, सुनसरी, महोत्तरी, बारा, चितवन र नवलपरासीमा बर्डफ्लु नियन्त्रणका क्रममा करिब सात लाख पन्छी, ११ लाख अण्डा र तीन लाख किलोग्राम दाना नष्ट गरिएको थियो । यसबाट करिब ७० करोड रुपैयाँ बराबरको आर्थिक क्षति भएको अनुमान गरिएको छ ।

बर्डफ्लु रोग नियन्त्रण (चौथो संशोधन) २०७४ ले प्रमाणित क्षतिको मूल्याङ्कनका आधारमा नष्ट गरिएका पन्छी, पन्छीजन्य पदार्थ तथा उत्पादन सामग्रीको ७५ प्रतिशतसम्म क्षतिपूर्ति उपलब्ध गराउने व्यवस्था गरेको छ ।