काठमाडौं, ३ माघ । नेपाली कांग्रेसले पार्टीबाट सरकारमा गएका मन्त्रीहरूलाई हप्तामा दुई दिन जनताबीच जान निर्देशन दिएको छ । सभापति शेरबहादुर देउवा निवास बूढानीलकण्ठमा बसेको कांग्रेस कार्यसमिति सदस्य र मन्त्रीहरूको संयुक्त बैठकले मन्त्रीहरूलाई पार्टी कार्यकर्ता र जनताको गुनासो सुन्न निर्देशन दिएको प्रमुख सचेतक श्याम घिमिरेले जानकारी दिए ।

बैठकपछि प्रमुख सचेतक श्याम घिमिरेले भने, ‘हप्तामा दुई दिन मन्त्रीहरूले खुला भेटघाट गर्न मन्त्रीहरूलाई निर्देशन दिइएको छ । पार्टी अफिस गएर हप्तामा दुई दिन आलोपालो गरेर कार्यकर्तासँग भेटघाट गर्ने, नागरिकको गुनासो सुन्ने, सुझाव लिने र बाँकी पाँच दिन पूर्ण रुपमा मन्त्रालयको काममा केन्द्रीत हुन मन्त्रीहरुलाई निर्देशन दिइएको छ ।’
सरकारलाई सफल बनाउन सक्रिय हुने र नियमित छलफल गर्ने निर्णय गरेको उनले बताए ।

साथै प्रमुख सचेतक घिमिरेले सरकारले ल्याएको अध्यादेश कांग्रेसकै सहमतिमा ल्याएको भएकाले कुनै असन्तुष्टि नरहेको पनि बताए । अध्यादेश सल्लाहमा आएको र अनावश्यक चर्चा गर्नू आवश्यक नभएको निष्कर्ष निकालेको उनले बताए ।