काठमाडौं, ७ पुस । चालू आर्थिक वर्ष (आव) २०८१/८२ को मंसिर मसान्तसम्ममा वीरगंज भन्सार कार्यालयबाट हुने वैदेशिक व्यापार ४ प्रतिशतले बढेको छ ।

वीरगंज भन्सारको तथ्याङ्क अनुसार चालू आवको मंसिरसम्ममा गत आवको सोही अवधिको तुलनामा वैदेशिक व्यापार ४ दशमलव १३ प्रतिशत बढेको हो । गत मंसिरसम्ममा यो भन्सारबाट रू. २ खर्ब ६५ अर्ब ८३ करोड ४९ लाखको वैदेशिक व्यापार भएको छ । सो अवधिमा रू. २ खर्ब ४६ अर्ब १२ करोड ३० को आयात हुँदा रू. १९ अर्ब ७१ करोड १८ लाखको मात्रै निर्यात भएको छ । गतवर्षको सोही अवधिमा रू. २ खर्ब ५५ अर्ब २६ करोड ७१ लाखको वैदेशिक व्यापार भएको थियो ।

यो भन्सारले २०८१ को मंसिरसम्ममा रू. ८७ अर्ब ३३ करोड ९४ लाख कुल भन्सार राजस्व संकलन गर्ने लक्ष्य राखेकोमा रू. ६४ अर्ब ५९ करोड ५१ लाख संकलन गरेको छ , जुन ७३ दशमलव ९६ प्रतिशत हो । गत आवको यसै अवधिमा कुल भन्सार राजस्व संकलन रू. ६१ अर्ब ९९ करोड ९६ लाख भएको थियो ।

सो अवधिमा भन्सार राजस्व (आयात) रू. ३५ अर्ब ७० करोड ७६ लाख उठाउने लक्ष्य रहेकोमा रू. २४ अर्ब ८ करोड १५ लाख अर्थात ६७ दशमलव ४४ प्रतिशत मात्रै संकलन भएको छ ।