काठमाडौं, २१ फागुन । चालू आर्थिक वर्ष २०८१–८२ को पहिलो सात महिनामा नेपालबाट भएको कुल निर्यातमा उल्लेखनीय वृद्धि देखिएको छ। अघिल्लो आर्थिक वर्ष २०८०–८१ को सोही अवधिको तुलनामा चालू आवको साउन (माघ अवधिमा निर्यात ४६.५० प्रतिशतले वृद्धि भएको छ। आर्थिक वर्षको साउन–माघ अवधिमा नेपालबाट ८६.८३ अर्ब रुपैयाँ बराबरको निर्यात भएको थियो भने आर्थिक वर्षको सोही अवधिमा निर्यात बढेर १२७.२० अर्ब रुपैयाँ पुगेको छ।

नेपालका निर्यात गन्तव्य मुलुकहरूमध्ये भारत पहिलो स्थानमा रहेको छ। गत वर्षको तुलनामा भारततर्फको निर्यात ६६.९० प्रतिशतले वृद्धि भई ९८.०१ अर्ब रुपैयाँ पुगेको छ। संयुक्त राज्य अमेरिका, जर्मनी, चीन, संयुक्त अधिराज्य (युके) लगायतका मुलुकहरू नेपालका प्रमुख निर्यात गन्तव्य हुन्।

संयुक्त राज्य अमेरिकातर्फको निर्यात ५.१२ प्रतिशतले वृद्धि भई १०.०३ अर्ब रुपैयाँ पुगेको छ। जर्मनीतर्फ ३८.८१ प्रतिशतले वृद्धि भई २.५२ अर्ब रुपैयाँको निर्यात भएको छ। जापानतर्फको निर्यातमा २०.८४ प्रतिशतको वृद्धि देखिएको छ, जसअनुसार कुल निर्यात १.१० अर्ब रुपैयाँ पुगेको छ।

तर, केही मुलुकहरूमा भने नेपाली निर्यात घटेको देखिन्छ। चीनतर्फको निर्यात ३.९५ प्रतिशतले घटेर २.०१ अर्ब रुपैयाँमा झरेको छ भने संयुक्त अधिराज्यतर्फको निर्यात ६.९८ प्रतिशतले घटेर १.८७ अर्ब रुपैयाँमा सीमित भएको छ। त्यस्तै, संयुक्त अरब इमिरेट्स र फ्रान्सतर्फको निर्यात क्रमशः ५.७२ प्रतिशतले घटेर १.१६ अर्ब रुपैयाँ पुगेको छ।

सबैभन्दा उच्च निर्यात वृद्धिदर अफगानिस्तानतर्फ देखिएको छ। गत वर्ष ०.०५ अर्ब रुपैयाँ रहेको निर्यात १२१२.६० प्रतिशतले वृद्धि भई ५९ करोड रुपैयाँ पुगेको छ।
यो वृद्धिले नेपालका उत्पादनशील उद्योगहरूको सुधार तथा व्यापार नीतिहरूको प्रभावकारितालाई दर्शाउँछ। तर, केही प्रमुख गन्तव्यहरूमा निर्यातमा गिरावट देखिएको छ, जसलाई सुधार गर्न नीति निर्माण आवश्यक देखिन्छ।