काठमाडौं, ९ माघ । आइसिएफसि फाइनान्स लिमिटेडले ऋणपत्र निष्कासन तथा विक्री खुला गरेको छ । फाइनान्सले ७ वर्ष अवधिको वार्षिक ९ प्रतिशत ब्याजदरमा ‘९ प्रतिशत आइसिएफसि फाइनान्स लिमिटेड डिबेञ्चर २०८८’ निष्कासन गरेको हो ।

फाइनान्सले प्रतिऋणपत्र एक हजार अंकित दरका ३० करोड रुपैयाँ बराबरको ३ लाख कित्ता ऋणपत्र निष्कासन गरेको हो, जसमध्ये १८ करोड रुपैयाँ बराबरको १ लाख ८० हजार कित्ता ऋणपत्र व्यक्तिगत तवरबाट बाँडफाँट गरिनेछ भने बाँकी १२ करोड रुपैयाँ बराबरको १ लाख २० हजार कित्ता सर्वसाधारणमा बाँडफाँट गरिनेछ । सर्वसाधारणमा बाँडफाँट गरिने ऋणपत्रमध्ये ५ प्रतिशत अर्थात ६ हजार कित्ता ऋणपत्र सामूहिक लगानी कोषहरुका लागि छुट्याइएको छ ।

सो ऋणपत्रमा लगानीकर्ताले न्यूनतम २५ कित्ता अर्थात् २५ हजार रुपैयाँ सम्मको आवेदन दिनुपर्छ । त्यस्तै अधिकतम १ लाख २० हजार कित्ताका लागि आवेदन दिन सकिने क्यापिटलले जनाएको छ ।

अनलाइन प्रणाली मेरोशेयरमार्फत ऋणपत्रमा आवेदन दिन सकिनेछ । छिटोमा माघ १३ र ढिलोमा २३ गतेसम्म आवेदन खुल्नेछ । ७ वर्षे अवधिको यस ऋणपत्र दोस्रो बजारमा सूचीकृत भइ कारोबारमा आउनेछ ।