129 Views
काठमाडौं, नेपाल राष्ट्र बैंकले धनतेरसको दिन कात्तिक १३ मा सुनको असर्फी बिक्री गर्ने भएको छ ।
राष्ट्र बैंक टक्सार महाशाखाले बिहीबार सूचना प्रकाशित गर्दै आगामी मंगलबार एक दिनका लागि २.५ ग्राम तौलका सुनका असर्फी बिक्री गर्ने जनाएको हो । सुनको असर्फी अभाव भएकाले १३ कात्तिमा १ दिन मात्रै बिक्री गर्न लागिएको राष्ट्र बैंकले जनाएको छ ।
उक्त दिन बिहान ११ देखि दिउँसो ४ बजेसम्म सिक्का बिक्री गरिनेछ भने एउटा व्यक्तिलाई एक थानका दरले सुरुमा आउनेलाई प्राथमिकतामा राखेर उपलब्ध भएसम्म मात्रै असर्फी बिक्री हुने राष्ट्र बैंकले जनाएको छ । सुनको सिक्काको मूल्य भने सोही दिनको बजार मूल्यका आधारमा निर्धारण हुने राष्ट्र बैंकले बताएको छ ।
‘सुनको असर्फी २.५ ग्राम प्रतिव्यक्ति एक थानका दरले ‘फर्स्ट कम फर्स्ट सर्भिस’ का आधारमा १३ कात्तिक मंगलबार एकदिन मात्र बिहान ११ बजेदेखि मौज्दात कायम रहेमा मध्याह्न ४ बजेसम्म बिक्री गरिने छ,’ राष्ट्र बैंकको सूचनामा छ ।
त्यस्तै, १० तथा २५ ग्रामको चाँदीको सिक्का भने कात्तिक ११ देखि १४ सम्म सोही समय बिक्री हुनेछ । ११ बजेदेखि मध्याह्न ४ बजेसम्म प्रतिव्यक्ति बढीमा पाँच थानसम्म बिक्री हुने राष्ट्र बैंकले जनाएको छ । राष्ट्र बैंकले चाँदी सिक्काको मूल्य तौल र डिजाइनअनुसार २२०० देखि ८५७५ रुपैयाँसम्म तोकेको छ ।
चाँदीको मेडालियन गाई अंकित २५ ग्राम, गाई अंकित १० ग्राम, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राम मध्येबाट बिक्री हुने राष्ट्र बैंकले जनाएको छ ।
तिहारमा धनतेरसको दिन सुन, चाँदीजस्ता बहुमूल्य धातुको असर्फी तथा सिक्का किन्ने चलन छ । यस दिन धातुका सामान किन्नु शुभ मानिने धार्मिक मान्यता छ ।
असर्फी, चाँदीका स्मारिका र मेडालियन खरिदका लागि अनिवार्य सक्कल नागरिकता वा परिचय खुल्ने प्रमाण र त्यसको प्रतिलिपि सहित उपस्थित हुनुपर्ने राष्ट्र बैंकको भनाइ छ ।
असर्फी तथा मेडालियन खरिद गर्न नगद तथा क्यूआर मार्फत समेत भुक्तानी गर्न सकिने छ । सुनको असर्फीको दर दैनिक निर्धारण हुने भएकाले सोही दिन ११ बजेपछि मात्र यस महाशाखाबाट बिक्री सुरु हुने राष्ट्र बैंकले जनाएको छ ।
