काठमाडौं, ११ असोज । नारायणी नदीको जलस्तर बढेसँगै पश्चिम नवलपरासीको सुस्ता गाउँपालिका–५ का विभिन्न बस्ती डुबानमा परेका छन् । नदीको बाढी थारुटोल, सैनिक टोल, पहाडी टोल र बड्का टोलमा पसेपछि करिब १७० घरधुरी प्रभावित भएका हुन् ।

बाढी प्रभावित क्षेत्रमा नेपाल प्रहरीले उद्धार तथा सुरक्षित स्थानान्तरणको कामलाई तीव्र बनाएको छ । वृद्धवृद्धा, महिला तथा बालबालिकासहित करिब ४ सय जनालाई प्रहरीले सुरक्षित रूपमा विपद् व्यवस्थापन भवनमा स्थानान्तरण गरेको जनाएको छ ।

नदीको बहाव निरन्तर बढिरहेका कारण जोखिममा रहेका थप परिवारलाई समेत सुरक्षित स्थानमा सार्ने काम भइरहेको प्रहरीले जनाएको छ ।

बाढीका कारण इलाका प्रहरी कार्यालय सुस्ताको परिसरसमेत डुबानमा परेको छ । कार्यालयमा रहेका हातहतियार तथा अन्य प्रहरी सामग्रीलाई सम्भावित जोखिमबाट जोगाउन सुरक्षित स्थानमा सारिएको छ ।

उद्धार तथा राहत कार्यका लागि जिल्ला प्रहरी कार्यालय नवलपरासी पश्चिम, इलाका प्रहरी कार्यालय सुस्ता र बेलाटारी, सशस्त्र प्रहरी बलको बीओपी सुस्ता तथा नेपाली सेनाको टोली आवश्यक विपद् उद्धार सामग्रीसहित परिचालन गरिएको छ ।