काठमाडौं, ९ असोज । अविरल वर्षासँगै आएको बाढी र पहिरोका कारण देशका विभिन्न प्रमुख सडकखण्डमा यातायात प्रभावित भएको छ । प्रहरी प्रधान कार्यालयका अनुसार पृथ्वी राजमार्ग, मुग्लिन–नारायणगढ, कान्ति लोकपथ र बीपी राजमार्गसहितका सडकमा पहिरो खसेपछि आवागमन अवरुद्ध भएको हो ।

धादिङ प्रशासनले शुक्रबार असोज ९ गते बिहान सूचना जारी गर्दै अर्को व्यवस्था नभएसम्म पृथ्वी राजमार्गमा सवारीसाधन सञ्चालनमा रोक लगाएको छ । राजमार्गको कृष्णभीरलगायत सात स्थानमा पहिरो खसेपछि सडक पूर्णरूपमा बन्द भएको प्रशासनले जनाएको छ ।

यस्तै, चितवन प्रशासनले पनि मुग्लिन–नारायणगढ सडकखण्ड अर्को सूचना जारी नभएसम्मका लागि बन्द गरेको छ । लगातारको वर्षाका कारण पहिरोको जोखिम बढेपछि उक्त सडकमा यातायात रोकिएको हो ।

कान्ति लोकपथअन्तर्गत ललितपुरतर्फ तीन स्थानमा पहिरो खसेपछि सडक अवरुद्ध भएको प्रहरीले जनाएको छ ।

बीपी राजमार्गमा पनि पहिरोका कारण यातायात रोकिएको छ । शुक्रबार बिहान करिब ४ः३० बजे रोशी गाउँपालिका–७ चारसयबेँसी र रोशी गाउँपालिका–८ गिम्दीमा पहिरो खसेपछि सडक अवरुद्ध भएको प्रहरीले जनाएको छ ।