काठमाडौं, १८ साउन । बंगलादेशकी पूर्वप्रधानमन्त्री शेख हसिना सत्ताच्युत भएको करिब दुई वर्षपछि पहिलोपटक सार्वजनिक रूपमा मिडियासामु आउने भएकी छन् । उनी आगामी अगस्ट ५ मा भारतको नयाँ दिल्लीमा आयोजना हुने भर्चुअल कार्यक्रममा सहभागी हुँदै आफ्नो राजनीतिक भविष्य, बंगलादेशको पछिल्लो अवस्था र स्वदेश फर्किने सम्भावनाबारे धारणा राख्ने कार्यक्रम तय भएको हो ।

‘फरेन करेस्पोन्डेन्ट्स क्लब अफ साउथ एसिया’ले आयोजना गर्ने उक्त कार्यक्रम नयाँ दिल्लीस्थित सर मार्क टली अडिटोरियम, मथुरा रोडमा साँझ ६ बजेदेखि ७ः३० बजेसम्म सञ्चालन हुनेछ । कार्यक्रमको प्रत्यक्ष प्रसारण क्लबका आधिकारिक सामाजिक सञ्जालमार्फत पनि गरिने आयोजकले जनाएको छ ।

टाइम्सअफ इन्डियाका अनुसार हसिनाको करिब १६ वर्ष लामो शासन अन्त्य भएको दोस्रो वर्ष पूरा भएको अवसरमा कार्यक्रम आयोजना गर्न लागिएको हो । सन् २०२४ अगस्ट ५ मा आरक्षण प्रणालीविरुद्ध सुरु भएको विद्यार्थी आन्दोलन विस्तारै सरकारविरोधी जनआन्दोलनमा परिणत भएको थियो । आन्दोलन हिंसात्मक बनेपछि र प्रदर्शनकारीहरूले सरकारी संरचनाहरूमा प्रवेश गर्न थालेपछि शेख हसिना बंगलादेश छाडेर भारत पुगेकी थिइन् ।

कार्यक्रममा शेख हसिनासँगै बंगलादेशका विभिन्न राजनीतिक नेता, पूर्वमन्त्री, कूटनीतिज्ञ तथा विश्लेषकहरूको पनि सहभागिता रहने जनाइएको छ ।