काठमाडौं, १० साउन । ‘नागढुङ्गा–सिस्नेखोला सुरुङमार्ग’ सुरुङमार्ग भोलि उद्घाटन गरिने भएको छ । पूर्वाधार विकासमन्त्री सुनिल लम्साल र जापान अन्तर्राष्ट्रिय सहयोग नियोग (जाइका) का अध्यक्षले संयुक्त रूपमा सुरुङमार्गको उद्घाटन गर्ने कार्यक्रम तय गरिएको हो ।

सडक विभागका अनुसार उद्घाटनपछि सुरुङमार्ग तत्काल सर्वसाधारणका लागि खुला गरिने छैन । प्रारम्भिक चरणमा एम्बुलेन्स, दमकल तथा सुरक्षा निकायका आकस्मिक सेवाका सवारीसाधनलाई मात्र सुरुङमार्ग प्रयोग गर्न अनुमति दिइनेछ ।

उद्घाटनपश्चात् सुरुङभित्र हुन सक्ने सम्भावित दुर्घटना, आगलागी तथा अन्य विपद् व्यवस्थापनको तयारीका लागि एक साताभित्र ‘मक ड्रिल’ (नमुना अभ्यास) सञ्चालन गर्ने विभागले जनाएको छ । उक्त अभ्यास सफल भएपछि सुरुङमार्गलाई करिब एक सातासम्म परीक्षणका रूपमा एकतर्फी (वान–लेन) सञ्चालन गरिने योजना छ ।

यी सबै प्रक्रिया पूरा भएपछि मात्र सुरुङमार्ग पूर्ण रूपमा सर्वसाधारणका लागि सञ्चालनमा ल्याइने सडक विभागले जनाएको छ ।