काठमाडौं, २६ असार । त्रिपुरेश्वरस्थित राहदानी विभाग अगाडि आत्मदाहको प्रयास गरेका मुगुको सोरु गाउँपालिका–१ निवासी २५ वर्षीय गणेश नेपालीको उपचारका क्रममा मृत्यु भएको छ ।

शरीरको करिब ६० प्रतिशत भाग जलेर गम्भीर घाइते भएका नेपालीको वीर अस्पतालमा सघन उपचार भइरहेको थियो । उपचारका क्रममा उनको निधन भएको प्रहरी परिसर काठमाडौंले पुष्टि गरेको छ । यद्यपि, वीर अस्पताल प्रशासनले यसबारे औपचारिक सूचना सार्वजनिक गरिसकेको छैन ।

वीर अस्पतालको प्लास्टिक सर्जरी विभागका अनुसार आगलागीका कारण नेपालीको अनुहार, टाउको, घाँटीलगायत शरीरका महत्वपूर्ण अंगमा गम्भीर क्षति पुगेको थियो । अस्पताल ल्याइएलगत्तै श्वासप्रश्वासमा समस्या देखिएपछि आकस्मिक कक्षमै इन्टुबेसन गरी भेन्टिलेटरमा राखेर उपचार सुरु गरिएको थियो ।

नेपालीले बिहीबार त्रिपुरेश्वरस्थित राहदानी विभागको कार्यालय अगाडि आफ्नै शरीरमा पेट्रोल छर्किएर आगो लगाएका थिए । घटनापछि तत्काल उद्धार गरी वीर अस्पताल पुर्‍याइएको भए पनि उपचारका क्रममा उनको ज्यान गएको हो ।