काठमाडौं, १ चैत । युनाइटेड अरब इमिरेट्स (यूएई) स्थित नेपाली दूतावासले यूएईमा विकसित भइरहेको परिस्थितिलाई मध्यनजर गर्दै त्यहाँ रहेका नेपाली समुदायलाई सामाजिक सञ्जालमा अफवाह नफैलाउन आग्रह गरेको छ ।

दूतावासले आइतबार ‘एडभाइजरी–३’ जारी गर्दै यूएईको वर्तमान परिस्थितिसँग सम्बन्धित संवेदनशील सूचना, भिडियो वा तस्वीरहरू सामाजिक सञ्जाल वा अन्य डिजिटल माध्यमबाट पोस्ट, प्रसारण वा शेयर नगर्न अनुरोध गरेको छ ।

यूएईमा बसेका सबैले त्यहाँको कानुन पालना गर्नुपर्ने भएकाले गैरकानुनी तथा अनुमतिविनाका गतिविधिमा संलग्न नहुन पनि सचेत गराइएको छ । यूएईको कानुन अनुसार यस्ता कार्यमा संलग्न व्यक्तिलाई कम्तीमा १ देखि २ वर्षसम्म जेल सजाय र १ लाखदेखि २ लाख दिरामसम्म जरिवाना हुन सक्ने चेतावनी पनि दिइएको छ ।

दूतावासले यूएई सरकारले तोकेका सुरक्षा मापदण्डहरू पूर्ण रूपमा पालना गर्न तथा सही जानकारी आफ्ना साथीभाइबीच पनि फैलाउन आग्रह गरेको छ ।

साथै निष्क्रिय पारिएका र जमिनमा झरेका अवशेषका फोटो खिच्ने, नजिक जाने वा छुन खोज्ने जस्ता कार्य नगर्न पनि अनुरोध गरिएको छ ।

दूतावासले यूएई सरकारले जारी गरेका सुरक्षा मापदण्ड पूर्णपालना गर्न तथा सत्य र आधिकारिक जानकारीका लागि सम्बन्धित सरकारी निकायका आधिकारिक स्रोतहरू मात्र हेर्न नेपाली समुदायलाई सुझाव दिएको छ । साथै, अद्यावधिक जानकारीका लागि दूतावासको आधिकारिक फेसबुक पेज पनि नियमित हेर्न अनुरोध गरिएको छ ।