काठमाडौं, २४ पुस । नेपाल सरकारले अमेरिका–भेनेजुएलाबीच बढ्दो तनावलाई चासो व्यक्त गर्दै सबै पक्षलाई अधिकतम संयमता अपनाउन आग्रह गरेको छ । नेपालको परराष्ट्र मन्त्रालयले बुधबार बेलुका एक विज्ञप्ति निकालेर तनाव थप चर्किन सक्ने कुनै पनि कदम नचाल्न आग्रह गरेको हो ।

संयुक्त राष्ट्रसंघको बडापत्रअनुसार राज्यहरूको सार्वभौमिकता, क्षेत्रीय अखण्डता र राजनीतिक स्वतन्त्रताको पूर्ण सम्मान अपरिहार्य रहेकोमा नेपालले जोड दिएको छ ।

त्यस्तै, नेपालले विवादहरूलाई बल प्रयोग वा दबाबको माध्यमबाट नभई संवाद, कूटनीति र आपसी समझदारीका आधारमा शान्तिपूर्ण रूपमा समाधान गर्नुपर्ने विज्ञप्तिमार्फत भनेको छ ।

अमेरिकी सेनाले भेनेजुएलाको राजधानी लगायतका शहरमा आक्रमण गरी त्यहाँका राष्ट्रपति दम्पत्तिलाई नियन्त्रणमा लिएर न्यूयोर्कको हिरासत राखेपछि दुई देशबीच तनाव बढेको छ । विभिन्न मुलुकहरुले यस घटनालाई लिएर चासो र चिन्ता व्यक्त गरिरहेका छन् ।